Ҳамкории ҶСК «Марказҳои тасдиқкунанда, хизматрасониҳои давлатӣ ва таҳияи барномаҳои рақамӣ» ва Амонатбонк дар самти тавсеаи дастрасӣ ба хизматрасониҳои давлатии электронӣ
10 ноябри соли 2026 мулоқоти директори генералии ҶСК «Марказҳои тасдиқкунанда, хизматрасониҳои давлатӣ ва таҳияи барномаҳои рақамӣ» Ҷамшед Шарипов бо муовини Раиси Раёсати КВД БДА ҶТ «Амонатбонк» Фирдавс Ризвонзода баргузор гардид.
Дар ҷараёни мулоқот масъалаҳои ҳамкорӣ дар доираи татбиқи Фармони Президенти Ҷумҳурии Тоҷикистон аз 10 июли соли 2025 № 1046 «Дар бораи масъалаҳои пешниҳоди хизматрасониҳои давлатӣ дар шакли электронӣ» баррасӣ шуданд. Таваҷҷуҳи махсус ба муаррифии Портали ягонаи хизматрасониҳои давлатӣ eKhizmat ва расонидани кумаки амалӣ ба шаҳрвандон дар истифодаи он зоҳир гардид.
Бо ин мақсад, ҷонибҳо имконияти ташкили машваратҳоро дар нуқтаҳои мувофиқашудаи хизматрасонии бонк муҳокима намуданд. Пешбинӣ мешавад, ки шаҳрвандон дар ин нуқтаҳо барои насби барномаи мобилии eKhizmat, гузаштан аз худайнияткунонӣ тавассути ИМЗО ва пешниҳоди аризаҳои электронӣ барои гирифтани хизматрасониҳои давлатӣ роҳнамоӣ гиранд.
Ҳамкории мазкур ба истифодаи таҷрибаи Ҷамъият дар самти хизматрасониҳои рақамӣ ва имкониятҳои шабакаи хизматрасонии Амонатбонк барои дастгирии шаҳрвандон дар гузариш ба хизматрасониҳои онлайн равона шудааст.
Ин ташаббус ба татбиқи сиёсати давлатии рақамикунонӣ, баланд бардоштани саводнокии рақамии аҳолӣ ва тавсеаи дастрасӣ ба хизматрасониҳои давлатии электронӣ мусоидат хоҳад кард.