Санаи 18 августи соли 2026 дар қасри фарҳанги “Гулистон”-и ноҳияи Ҷаббор Расулов бахшида ба Рӯзи кормандони соҳаи тиб бо иштироки Раиси ноҳия Юлдошзода Олимбек чорабинии идона баргузор гардид.
Нахуст, Раиси ноҳияи Ҷаббор Расулов Юлдошзода Олимбек кулли собиқадорон ва кормандони соҳаи тандурустиро ба ифтихори Иди касбиашон, ки ҳамасола ба рӯзи 18-уми август, яъне санаи таваллуди асосгузори тибби ҷаҳон, нобиғаи оламшумур, олим, файласуф, донишманд Абӯалӣ ибни Сино тавъам меояд, таҳният намуда, барояшон рӯзгори хушу хуррам, саодати зиндагӣ ва муваффақиятҳо таманно намуданд.
Зимни ироаи паёми табрикии хеш Раиси ноҳия оид ба дастгирии давлатии соҳа аз ҷониби Ҳукумати Ҷумҳурии Тоҷикистон зери роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ёдовар шуда, иброз намуд, ки тавассути дастгирӣ ва кӯмакҳои доимии Президенти Ҷумҳурии Тоҷикистон муҳтарам Эмомалӣ Раҳмон давоми солҳои соҳибистиқлолӣ дар соҳаи тандурустии кишвар баҳри беҳтар намудани хизматрасониҳои тиббӣ корҳои назаррас дар қаламрави ҷумҳурӣ, аз ҷумла дар ноҳияи Ҷаббор Расулов ба анҷом расонида шуд.
Аз ҷумла, таъмиру тармими муассисаҳои тандурустӣ, таъмини муассисаҳо бо таҷҳизоти муосири тиббӣ ва нақлиётӣ, ёрии таъҷилӣ ва ба роҳ мондани усулҳои нави ташхису табобат шаҳодати гуфтаҳои болост.
Ҳоло дар ноҳия беморхонаи ноҳиявӣ, муассисаи давлатии Кӯмаки аввалияи тиббию санитарӣ ва Маркази назорати давлатии санитарию эпидемиологӣ фаъолият менамоянд.Маврид ба зикр аст, ки дар ноҳия маблағгузории соҳаи тандурустӣ сол то сол афзун гардида, ба пешрафти бонизоми соҳа мусоидат намуда истодааст.
Раиси ноҳия Юлдошзода Олимбек оид ба дастовардҳои кормандони соҳаи тиб дар ноҳияи Ҷаббор Расулов ибрози назар намуда, аз саҳми онҳо дар раванди беҳтар намудани сатҳу сифати хизматрасонии тиббӣ ба аҳолӣ ва мусоидат ба солимии ҷомеа ҳамчун боигарии давлат ёдовар шуданд.
Сипас, дар фазои тантанавӣ ба як қатор табибон ва собиқадорони соҳаи тандурустӣ аз ҷониби Раиси ноҳия Сипосномаву туҳфаҳои хотиравии мақомоти иҷроияи ҳокимияти давлатии ноҳияи Ҷаббор Расулов тақдим карда шуд.
Дар охир, баҳри болидахотирии кормандони соҳаи тиб барномаи фарҳангӣ пешкаш карда шуд.