Амалӣ гардонидани чорабиниҳои мунтазам оид ба беҳтар намудани вазъи соҳаи кишоварзӣ, роҳҳои ҳалли мушкилот ва таъмини рушди устувори он ба хотири расидан ба яке аз ҳадафҳои стратегии миллиамон – таъмини амнияти озуқаворӣ ва муҳимтар аз ҳама, худкифо шудани Тоҷикистон аз лиҳози таъмини маводи ғизоӣ, вазифаи аввалиндараҷа ба шумор меравад.
Бо дастгирии Ҳукумати Ҷумҳурии Тоҷикистон аз ҷониби Муассисаи давлатии “Рушди соҳибкорӣ дар соҳаи кишоварзӣ” дар доираи лоиҳаи “Баланд бардоштани устувории кишоварзӣ” ҷиҳати афзун намудани молу маҳсулоти кишоварзӣ, коркард, пешгирӣ аз талафёбии ҳосил, нигаҳдорӣ ва бастубанди он баҳри содирот ба хориҷи кишвар дар ҳудуди Ҷумҳурии Тоҷикистон бунёди марказҳои агрологистикӣ ба нақша гирифта, то имрӯз бунёди бинои маркази агрологистикӣ дар вилояти Суғд ва Хатлон дар арафаи анҷомёбӣ мебошанд.
Санаи 01.09.2026 мутахассисони масоили иҷтимоӣ ва экологии Муассисаи давлатии “Рушди соҳибкорӣ дар соҳаи кишоварзӣ” бо намояндаи ширкати лоиҳакаш ҶДММ Барс консалтинг ва пудратчии ҶСШК ТГЭМ мулоқоти корӣ оид ба оғози корҳо ва сафарбаркунӣ оид ба бунёди маркази агрологистикӣ дар шаҳри Душанбе баргузор намуданд.
Ҷонибҳо дар рафти мулоқот масъалаи асосӣ ҷиҳати иҷрои талаботҳои стандартҳои экологию ичтимоии Бонки умумиҷаҳонӣ ва риояи ҳатмии техникаи бехатариро мавриди муҳокима қарор доданд.
Ҳамчунин дар санаи 04.09.2026 мутахассисони масоили иҷтимоӣ ва экологии муассиса дар якҷоягӣ бо муҳандисон дар раванди оғози бунёди маркази агрологистикӣ дар шаҳри Душанбе иштирок намуда, аз ҳолати ҷойҳои обу ташноб, ошхонаву ҷои хоби коргарон ва дигар ҷойҳои кории онҳо дидан намуданд.
Сипас бо кормандону пудратчиёне, ки ба корҳои сохтмонӣ ҷалб гардидаанд ҷаласаи ҷамъиятӣ баргузор намуда, ҷиҳати иҷроиши нақшаи идоракунии муҳити зист бо дарназардошти фикру мулоҳизаҳо, натиҷаҳои арзёбии таъсир ба муҳити зист, тибқи талаботҳои стандартҳои иҷтимоиву экологӣ Бонки ҷаҳонӣ, риояи қоидаҳои беҳдоштиву санитарӣ, техникаи бехатарӣ, иҷроиши талаботу меъёрҳои амалкунандаи Қонунгузории Ҷумҳурии Тоҷикистон, механизми баррасии арзу дархостҳо ва иҷроиши дигар Қонунҳои амалкунанда маълумотҳои муфассал пешкаш карданд.
