Боғу токпарварӣ яке аз соҳаҳои муҳими кишоварзӣ дар таъмини аҳолӣ бо ғизои зарурӣ аст. Иқлими Тоҷикистон барои парвариши боғҳои мевадиҳанда мусоид буда, манбаи меваҷоти болаззат, ашёи хом барои саноати кишвар ва содирот мебошад.
Муассисаи давлатии “Рушди соҳибкорӣ дар соҳаи кишоварзӣ” дар доираи лоиҳаи “Баланд бардоштани устувории кишоварзӣ” мониторинги ҳолати нашъунамои ниҳолҳои дарахтони нодири ороишӣ ва тагпайвандҳоро дар 13 хоҷагиҳои ниҳолпарварии Корхонаи воҳиди давлатии «Тоҷикниҳолпарвар»-и Вазорати кишоварзии Ҷумҳурии Тоҷикистон идома дода истодааст.
Ин навбат мутахассисони муассиса дар якҷоягӣ бо роҳбарони хоҷагиҳои ниҳолпарварии ноҳияҳои Ёвон, А.Ҷомӣ, Кӯшониён, ва Мир Сайид Алии Ҳамадонӣ, дар рафти корҳои агротехникӣ аз қабили нашъунамои ниҳолҳои хоҷагиҳо, нармкунии гирду атрофии он, ғизодиҳӣ, чораҳои муҳофизатӣ ва дигар корҳои байни қаторӣ дидан намуда, ҷиҳати боз ҳам беҳтар намудани парвариши наврустаҳо ва тагпайвандҳо ба масъулин тавсияҳои судманди илмӣ пешниҳод намуданд.
