Кумитаи кор бо занон ва оилаи назди Ҳукумати Ҷумҳурии Тоҷикистон дар раванди амалишавии Барномаи давлатии рушди оила дар Ҷумҳурии Тоҷикистон бо назардошти хусусиятҳои хоси муносибатҳои оиладорӣ, тақвияти масъулиятнокии падару модар ва фарзандон дар муносибатҳои оилавӣ, густариши фарҳанги оиладорӣ, нақши ҳамсарон дар тарбия ва ташаккули шахсияти фарзанд, тарбияи фарзандони инсондӯсту ватанпараст даври ниҳоии озмунҳои ҷумҳуриявии «Ҳамсари беҳтарин» ва «Фарзанд-боғи падару модар»-ро бо иштироки ғолибон-ҳамсарон ва фарзандони беҳтарини шаҳру ноҳияҳои мамлакат доир намуд. Озмуни мазкур дар доираи таҷлили 34-умин солгарди Истиқлоли давлатии Ҷумҳурии Тоҷикистон рӯи кор омад, ки шаҳодат аз тантанаи муваффақияту дастовардҳои давлату Ҳукумати кишвар дар роҳи эъмори давлату давлатдорӣ, минҷумла, таҳкими пояҳои оиладорӣ мебошад. Зеро, Конститутсияи Ҷумҳурии Тоҷикистон баробарҳуқуқии мардону занонро дар асоси моддаи 17 кафолат дода, тибқи моддаи 33 давлат оиларо ҳамчун ниҳоди муҳими иҷтимоӣ зери ҳимояи худ қарор додааст. Раиси Кумита Файзиддинзода Бунафша зимни баромади худ зикр намуданд, ки мустаҳкамӣ, пойдорӣ ва солимии оила ва аҳли хонавода фаъолияти меҳварии Кумитаро ташкил дода, ба хотири мустаҳкамии оила, тақияти муносибатҳои созанда ва баланд бардоштани маърифати оиладорӣ, тарбияи фарзандони соҳибхираду соҳибмаърифат ва ба ин васила, коҳиш додани раванди таъсиррасонии омилҳои доғи рӯз ба муносибатҳои оиладорӣ сислсилаи чорабиниҳои сиёсӣ, фарҳангӣ, оммавӣ ва иттилоотӣ доир гардиданд, ки таваҷҷӯҳи ҷомеаро ба ин масъалаи ниҳоят муҳим ҷалб намуд. Озмунҳои ҷумҳуриявии «Ҳамсари беҳтарин» ва «Фарзанд-боғи падару модар» низ ба мақсади баланд бардоштани масъулияти оила дар таҳкими фарҳанги оиладорӣ, тақвияти мақом ва нақши ҳамсарон дар оила ва ҷомеа, тарбияи фарзандони худогоҳу хештаншинос, масъулияти оила дар таълиму тарбияи фарзанд ва масъулияти фарзанд дар парасторӣ ва нигоҳубини падару модар, эҳтирому арҷгузории оила ба фарҳангу тамаддуни миллӣ ба болоравии мақоми оила, мақоми ҳамсарон, мақоми фарзанд замина гузошта, ҷиҳати коҳиш додани пошхӯрии оилаҳо, бесарпаноҳ мондани фарзандон, коҳиш додани раванди таъсиррасонии омилҳои доғи рӯз ба муносибатҳои оиладорӣ мусоидат менамояд, афзуд Раиси Кумита Файзиддинзода Бунафша Давлатзода Зулфия, сардори Раёсати рушди иҷтимоии Дастгоҳи иҷроияи Президенти Ҷумҳурии Тоҷикистон дар навбати худ зимни суханронӣ аз мақом ва мартабаи оила дар раванди давлатдорӣ ва пешрафти ҷомеа, таҳти таваҷҷӯҳи давлату Ҳукумати мамлакат қарор доштани оила ва ҳифзи ҳуқуқу манфиатҳои оила баёни андеша намуд. Бо хулосаи ҳайати Комиссияи озмун Ҷурахонзода Нурхон ҳамчун ҳамсари беҳтарин аз ноҳияи Данғараи вилояти Хатлон ва Шоназарова Карина аз шаҳри Хоруғи ВМКБ ҳамчун фарзанди беҳтарин дониста шуда, сазовори ҷойи аввали озмун гардиданд. Ғаниев Наимҷон аз шаҳри Конибодоми вилояти Суғд, Султонмамадов Парвона сазовори ҷойи дуюм, Азимов Фатҳулло аз шаҳри Ваҳдат, Алиев Далер аз ноҳияи Рӯдакӣ ва Қурбониён Завқибег аз ноҳияи Фирдавсии шаҳри Душанбе ба гирифтани ҷойи сеюм ва Имодова Қиматпочо аз ноҳияи Рашт бо ҷои ифтихорӣ дар номинатсияи «Ҳамсари беҳтарин» сазовор гардиданд. Ҳасанзода Малика аз шаҳри Кӯлоби вилояти Хатлон, Умедҷон Амонӣ аз ноҳияи Ашти вилояти Суғд ба гирифтани ҷойи дуюм, Қурбонзода Мадина аз ноҳияи Синои шаҳри Душанбе, Амиров Амирҷон аз ноҳияи Рашт ва Бобоализода Чаманоро аз шаҳри Турсунзода бо ҷойи сеюм дар номинатсияи «Беҳтарин фарзанд» ғолиб дониста шуданд. Бешбуҳа, баргузории чунин озмунҳои тарбиявӣ-ахлоқӣ дар низоми оиладорӣ ва фарзандсолорӣ нақши арзишманд мегузоранд.