Имрӯз дар Кумитаи кор бо занон ва оилаи назди Ҳукумати Ҷумҳурии Тоҷикистон дар мавзӯи " Мақом ва нақши занон дар 35 соли рушди Тоҷикистони соҳибистиқлол: дастовардҳо, имкониятҳо ва дурнамо" Конференсияи илмӣ баргузор гардид. Дар конференсияи…
Имрӯз дар Кумитаи кор бо занон ва оилаи назди Ҳукумати Ҷумҳурии Тоҷикистон дар мавзӯи " Мақом ва нақши занон дар 35 соли рушди Тоҷикистони соҳибистиқлол: дастовардҳо, имкониятҳо ва дурнамо" Конференсияи илмӣ баргузор гардид.
Дар конференсияи дастовардҳои занон дар даврони соҳибистиқлолӣ, нақши онҳо дар рушди иҷтимоию иқтисодии кишвар, таҳкими мавқеи зан дар ҷомеа ва баланд бардоштани иштироки онҳо дар ҳаёти сиёсиву ҷамъиятӣ таҳлил карда шуд.
Дар ҳамоиш намояндагони Кумитаи кор бо занон ва оила, олимону муҳаққиқон, коршиносон, намояндагони сохторҳои давлатӣ ва муассисаҳои илмию таълимӣ иштирок намуданд.
Зимни ифтитоҳи ҳамоиш муовини якуми раиси Кумитаи кор бо занон ва оила Мадина Набзода таъкид намуд, ки дар даврони соҳибистиқлолӣ масъалаи баланд бардоштани мақоми зан ва фароҳам овардани шароити мусоид барои фаъолияти ҳамаҷонибаи онҳо яке аз самтҳои муҳими сиёсати иҷтимоии давлат ба ҳисоб меравад.
«Дар давоми 35 соли соҳибистиқлолӣ барои баланд бардоштани мақоми зан дар ҷомеа, ҳифзи ҳуқуқу манфиатҳои онҳо ва фароҳам овардани имкониятҳои баробар тадбирҳои пайваста амалӣ гардиданд. Имрӯз мо шоҳиди он ҳастем, ки занони тоҷик бо дониш, малака, ташаббус ва фаъолияти созандаи худ дар рушди ҷомеа ва пешрафти давлат саҳми арзанда мегузоранд», — иброз шуд дар ҳамоиш.
Ҳамзамон таъкид гардид, ки ҷалби бештари занон ба соҳаҳои илм, технология, соҳибкорӣ ва идоракунии давлатӣ яке аз омилҳои муҳими рушди устувори ҷомеа мебошад. Дар ин раванд баланд бардоштани сатҳи маърифати ҳуқуқӣ, касбомӯзӣ, дастгирии ташаббусҳои созандаи занон ва фароҳам овардани шароити мусоид барои фаъолияти онҳо аҳамияти хосса дорад.
Дар идомаи ҳамоиш иштирокчиён доир ба дастовардҳои занон дар даврони соҳибистиқлолӣ, нақши онҳо дар таҳкими оила ва ҷомеа, иштироки занон дар рушди иқтисоди миллӣ, саҳми занони соҳибкор, омӯзгор, табиб, олим ва хизматчии давлатӣ андешаҳои худро баён намуданд.
