Имрӯз гурӯҳи таблиғотӣ – ташвиқотии «Таблиғгарони Истиқлол» таҳти роҳбарии Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода дар шаҳри Норак аз Ҷамъияти дорои масъулияти маҳдуди «Гулнур» шинос боздид…
Имрӯз гурӯҳи таблиғотӣ – ташвиқотии «Таблиғгарони Истиқлол» таҳти роҳбарии Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода дар шаҳри Норак аз Ҷамъияти дорои масъулияти маҳдуди «Гулнур» шинос боздид намуда, бо фаъолияти корхона ва раванди парвариши гулҳои ороишӣ дар гармхонаҳои муосир шинос шуданд.
Иттилоъ дода шуд, корхона дар ҷамоати деҳоти Дуконӣ, деҳаи Дуконии шаҳр ҷойгир буда, масоҳати умумии гармхонаҳо 10,9 гектарро ташкил медиҳад.
Айни замон 3 гектар гармхонаҳо сохта, ба истифода дода шудаанд. Дар як гектар гули садбарг ва дар ду гектари дигар гулҳои мавсимӣ парвариш карда мешаванд. Ҳадафи асосии корхона таъмини бозори дохилӣ бо гулҳои ороишии хушсифат ва ба талаботи бозор ҷавобгӯ мебошад.
Дар гармхонаҳо таҷҳизоти муосир аз Ҷумҳурии Мардумии Чин ворид ва насб гардида, равандҳои истеҳсолӣ бо истифода аз технологияҳои худкори рақамӣ ба роҳ монда шудаанд. Барои нигоҳ доштани ҳарорати зарурӣ дар фасли тобистон низоми худкори танзими ҳарорат истифода мешавад.
Айни замон дар гармхонаҳо тақрибан 2,5 миллион гул ва ниҳоли ороишӣ аз навъҳои гуногун, аз ҷумла петуния, салвия, хризантема, синӣ, колеус, синерария, астра, матиола ва дигар навъҳо парвариш ёфта, барои фурӯш омода мебошанд.
Фаъолияти гармхона барои таъсиси ҷойҳои нави корӣ низ мусоидат намудааст. Дар корхона зиёда аз 60 ҷойи кори доимӣ ва мавсимӣ ташкил шудааст, аз ҷумла дар корхона даҳҳо занони хонанишин бо ҷойи кор таъмин карда шудаанд. Кормандон бо либоси корӣ ва ғизои яквақта таъмин мебошанд.
