20 августи соли равон дар шаҳри Душанбе нахустин Форуми байналмилалии саноати хӯрокворӣ ва Намоишгоҳи саноати хӯрокворӣ – Тоҷикистон 2026 баргузор шуд. Дар доираи ҳамоиш, дар ҷаласаи 4 таҳти унвони «Тамоюлҳои ҷаҳонӣ дар саноати хӯрокворӣ: ҳамгироӣ ба занҷирҳои байналмилалии таъминот ва навоварӣ дар тарроҳии бастабандӣ», муовини директори Агентии содироти назди Ҳукумати Ҷумҳурии Тоҷикистон Ҷамолзода Абдуғаффор маъруза намуд.
Таъкид шуд, ки дар шароити кунунии бозори ҷаҳонӣ содироти муосир на танҳо аз ҳаҷми интиқол, балки аз эътимоди харидори хориҷӣ, риояи қатъии стандартҳои байналмилалии бехатарӣ, шаффофияти пайгирии маҳсулот ва устувории таҳвилот вобаста мебошад. Дар ин робита, масъалаи ҷорӣ намудани «шиносномаи рақамии маҳсулоти содиротӣ» ва рамзҳои QR дар бастабандӣ пешниҳод гардид, ки ба харидори хориҷӣ имкон медиҳад оид ба маҳалли истеҳсол, сифат ва тамоми занҷири таъминот маълумоти боэътимод ба даст орад.
Ҳамчунин зикр гардид, ки рушди саноати муосири бастабандии экологӣ, фаъолияти занҷири хунуккунӣ ва таъсиси марказҳои логистикиву кластерҳои содиротӣ омили калидии рақобатпазирии маҳсулоти ватанӣ дар бозорҳои хориҷӣ ба шумор меравад.
