Рӯзҳои 5–20-уми августи соли ҷорӣ, як қатор вохуриҳои раиси Кумитаи давлатии сармоягузорӣ ва идораи амволи давлатӣ Султон Раҳимзода бо Сафирони Фавқулодда ва Мухтори Шоҳигарии Арабистони Саудӣ Валид Абдураҳмон Ал-Решайдон, Иёлоти Муттаҳидаи Амрико Мануэл Микаллер, Федератсияи Россия Семён Григорев, Ҷумҳурии Халқии Хитой Го Жиҷун, Ҷумҳурии Қазоқистон Валихан Туреханов, Ҷумҳурии Ӯзбекистон Эргаш Шоисматов, Япония хонум Фуруто Кейко, Олмон Йорк Шуграф, Ҷумҳурии Беларус Виктор Денисенко, Ҷумҳурии Ҳиндустон Раҷеш Уйке, Ҷумҳурии Туркия Умут Аҷар, роҳбари Дафтари Ҳамкорӣ ва Агентии консулии Швейтсари хонум Дэнис Люти Кришан, инчунин муовинони Сафирони Фаронса хонум Матилд Жиро,Иттиҳоди Аврупо хонум Изабел Уриз Эрнандес ва Британи Кабир Пауэлл Гринҳалк баргузор гардид.
Зимни вохӯриҳо ҷонибҳо масъалаҳои марбут ба омодагиҳо дар баргузории Форуми байналмилалии сармоягузории “Dushanbe Invest – 2025”, ки рӯзҳои 14–16 октябри соли ҷорӣ дар шаҳри Душанбе таҳти унвони “Сармоягузории сабз: имконияти имрӯз барои устувории фардо” баргузор мегардад, мавриди баррасӣ қарор доданд.
Раиси Кумита таъкид намуд, ки Форум яке аз рӯйдодҳои муҳими байналмилалӣ буда, ҳадафи он муаррифии имкониятҳои сармоягузории “сабз” дар Тоҷикистон, тақвияти ҳамкориҳои иқтисодию тиҷоратӣ бо кишварҳои хориҷӣ, ҷалби сармояи мустақим барои татбиқи лоиҳаҳои инфрасохторӣ ва рушди саноат мебошад.
Дар ҷараёни мулоқотҳо, инчунин, масъалаҳои таҳкими ҳамкориҳои иқтисодӣ, афзоиши ҳаҷми сармоягузориҳои хориҷӣ, густариши робитаҳои тиҷоратӣ ва амалӣ намудани лоиҳаҳои муштарак дар соҳаҳои афзалиятнок баррасӣ гардиданд.
Сафирон омодагии худро барои ҳамкории фаъол дар ҷалби ширкатҳои пешсаф ва сармоягузорони кишварҳои худ ба иқтисодиёти Тоҷикистон баён намуда, баргузории Форуми байналмилалии сармоягузорӣ дар Душанберо қадами муҳим дар таҳкими робитаҳои иқтисодию сармоягузорӣ ва ҷалби сармояи хориҷӣ арзёбӣ намуданд.
Дар анҷоми вохӯриҳо ҷонибҳо изҳори итминон карданд, ки ҳамкориҳои минбаъда дар доираи Форум ва берун аз он заминаи мусоид барои татбиқи лоиҳаҳои нави сармоягузорӣ ва рушди шарикии мутақобилан судманд фароҳам хоҳад овард.
