Имрӯз, 19 марти соли равон, раиси вилояти Хатлон Давлатали Саид дар ҷараёни сафари корӣ ба ҷамоати Тахти Сангини ноҳияи Қубодиён бо рафти парвариши пиёз ва сирпиёзҳои барвақтӣ дар хоҷагии деҳқонии «Хоҷа-Мумин» шинос шуд ва ҳамчунин дар аксияи оғози кишти пахта зери плёнка дар муассисаи давлатии «Сортоозмоишгоҳи кишоварзии Авесто» ширкат варзид.
Роҳбари муассиса Абдуллоев Зайдулло ба раиси вилоят иттилоъ дод, ки масоҳати заминҳои хоҷагӣ 39,3 гектарро ташкил дода, аз онҳо 35 гектар заминҳои обӣ мебошанд, 20 гектар пахта кишт шудааст, 10 гектар зироатҳои ғалладонаги, 1 гектар боғ ва 3 гектар люцерна парвариш мешавад. Ҳоло деҳқон пахтаро дар масоҳати 5 гектар замини зери плёнка парвариш менамояд.
Баротов Қурбон, сардори хоҷагии деҳқонии «Хоҷа-Мумин», иттилоъ дод, ки масоҳати умумии хоҷагӣ 45 гектарро ташкил медиҳад ва пиёзро дар 5 гектар замин парвариш мекунад, ки ҳосили он ба 250 тонна мерасад. Ба иттилои манбаъ, 1,5 гектар нахӯд, 10 гектар гандум, 15 гектар люцерна кишт шудааст ва боғ дар масоҳати 1,5 гектар ташкил гардидааст.
Раиси вилоят дар ҳоле, ки ҷараёни рӯйдодҳои парвариши зироатҳои кишоварзиро ҳам дар кишти аслӣ ва ҳам дар кишти такрорӣ баррасӣ мекард, аз таҷрибаи истифодаи заминҳои деҳқонони ноҳия изҳори қаноатмандӣ намуда, меҳнати ҳалол ва самарабахши онҳоро намунавӣ номид. Ӯ бо деҳқонон суҳбат карда, ба онҳо маслиҳату тавсияҳои муфид барои истифодаи самараноки замин ва афзоиши истеҳсоли маҳсулоти кишоварзӣ дод.
Бар асоси дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар ҷаласаи калонҳуқуқи ҳукуматӣ бо деҳқонон иброз доштанд, соли ҷорӣ дар вилояти Хатлон кишти пахта дар масоҳати 124,5 ҳазор гектар ба нақша гирифта шудааст, ки аз ин миқдор 41 ҳазор гектар бо усули нави кишти зери плёнка анҷом хоҳад шуд.
