ДАСТГИРӢ ВА АЁДАТИ СОБИҚАДОРОНУ ЯТИМОН ДАР АРАФАИ ИДҲОИ РАМАЗОН ВА НАВРӮЗ

Дар арафаи идҳои мубораки Рамазон ва Наврӯз дар шаҳри Левакант тадбирҳои хайриявӣ ва дастгириҳои иҷтимоӣ тақвият ёфта, роҳбарияти шаҳр ба қишрҳои ниёзманди ҷомеа таваҷҷуҳи хоса зоҳир намуд.

Дар ҳамин замина, раиси шаҳри Левакант Муминзода Мастура Табарӣ ба аёдати яке аз чеҳраҳои шинохтаи фарҳанги шаҳр, собиқадори хизматнишондодаи соҳаи фарҳанг Бароталӣ Қурбонов рафт. Зимни мулоқот, ки дар фазои самимият ва эҳтиром сурат гирифт, саҳми арзандаи ин шахс дар рушди фарҳанги маҳаллӣ таъкид гардида, ба ӯ кумаки иҷтимоӣ расонида шуд. Ҳамзамон, ба собиқадор таманниёти нек ва сиҳатмандии бардавом изҳор карда шуд.

Инчунин, дар доираи сиёсати дастгирии иҷтимоӣ, раиси шаҳр ятимони кулли шаҳрро ба муносибати идҳои Рамазон ва Наврӯз табрик намуда, ба онҳо кумакҳои яквақтаинаи ғизоӣ тақдим кард. Кумаки мазкур аз ҳисоби мақомоти иҷроияи ҳокимияти давлатии шаҳри Левакант амалӣ гардида, маводи ниёзи аввал, аз ҷумла орд, равған, биринҷ, шакар ва дигар маҳсулоти озуқавориро дар бар мегирад.

Зикр гардид, ки чунин иқдомҳои хайриявӣ ба хотири дастгирии табақаҳои осебпазири ҷомеа ва боло бурдани рӯҳияи идонаи онҳо роҳандозӣ шуда, минбаъд низ идома хоҳанд ёфт.

Тадбирҳои мазкур бозгӯи сиёсати инсондӯстона ва иҷтимоии роҳбарияти олии кишвар, Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буда, барои таҳкими ҳамбастагӣ ва меҳру муҳаббат дар ҷомеа мусоидат менамоянд.