Санаи 17-уми октябри 2024 дар шаҳри Тошканди Ҷумҳурии Узбекистон ҷаласаи ҳаждаҳуми Шӯрои вазирони адлияи давлатҳои иштирокдори Иттиҳоди Давлатҳои Мустақил баргузор гардид, ки дар он вазири адлияи Ҷумҳурии Тоҷикистон Музаффар Ашуриён иштирок ва оид ба дастовардҳои ҳуқуқии Тоҷикистон дар самти боло бурдани сатҳи донишҳои ҳуқуқии шаҳрвандон баромад намуд.
Ҷаласаи навбатии Шӯрои вазирони адлияи давлатҳои иштирокдори Иттиҳоди Давлатҳои Мустақил таҳти раёсати раиси Шӯрои вазирони адлияи давлатҳои иштирокдори Иттиҳоди Давлатҳои Мустақил - вазири адлияи Ҷумҳурии Узбекистон гузаронида шуд, ки дар он роҳбарони мақомоти адлияи Ҷумҳурии Беларус, Ҷумҳурии Қирғизистон, Федератсияи Русия ва Ҷумҳурии Тоҷикистон иштирок намуданд.
Дар ҷаласа оид ба масъалаҳои амалисозии маърифати ҳуқуқӣ ҳамчун механизми муҳими баланд бардоштани сатҳи зиндагӣ, дар бораи нақши мақомоти адлия дар баланд бардоштани сифати хизмати ҳуқуқии мақомоти ҳокимияти давлатӣ дар маҳалҳо, мавриди муҳокима қарор дода шуданд. Вазири адлияи Ҷумҳурии Тоҷикистон зимни баромади худ изҳор намуд, ки баланд бардоштани маърифати ҳуқуқии шаҳрвандон яке аз вазифаҳои муҳимтарин ва нахустдараҷаи кишварҳое маҳсуб меёбад, ки роҳи бунёди давлати демократӣ ва ҳуқуқбунёдро пеш гирифтаанд. «Арзишҳои номбурда собит месозанд, ки давлат дар пояи қонун ва ҳуқуқ бунёд ёфта, рушди давлати демократӣ, ҳуқуқбунёд ва дунявӣ ба сатҳи дониш ва маърифати ҳуқуқии аҳолӣ вобастагии зиёд дорад. Дар ҳамин робиа баланд бардоштани маърифати ҳуқуқии аҳолӣ самти афзалиятноки сиёсати ҳуқуқии Ҷумҳурии Тоҷикистон дар шароити амалишавии ғояҳо ва арзишҳои ҳуқуқӣ ба ҳисоб меравад»,-иброз дошт ӯ.
Ҳамзамон ба таъкиди Музаффар Ашуриён мақсад аз қабули фармони Президенти Ҷумҳурии Тоҷикистон дар бораи эълон гардидани соли 2024 ҳамчун «Соли маърифати ҳуқуқӣ» низ ин баланд бардоштани сатҳи донишҳои ҳуқуқии шаҳрвандон, тарғиби арзишҳои демократӣ, таҳкими институти ҳуқуқи инсон, эҳтироми он, баланд бардоштани мақоми қонун, тарбияи шаҳрвандон дар рӯҳияи эҳтиром ба он ва таъмини волоияти қонун ташаккули низоми устувори рафтори ҳуқуқӣ, ташкили механизми самарабахши ҳамкории давлат ва институтҳои ҷомеаи шаҳрвандӣ дар самти тарбияи ҳуқуқии шаҳрвандон мебошад.
